CLICK HERE FOR BLOGGER TEMPLATES AND MYSPACE LAYOUTS »

الخميس، 16 يوليو، 2009

طريقة عمل البرجر اللذيد..










رجعتلكم تانى بعد طوول انتظار..وأسفه طبعاً على الغياب لكن لما اغيب كل شويه كده اعرفوا انها فعلا حاجات اقوى منى..



خلينا فى المهم..

اليوم هنحضر خلطة البرجر..وانصحكم بلاش تشتروا برجر مغلف او غير مغلف من بره تانى حتى لو كان من نوع نضيف..

أولاَ..علشان احنا منعرفش هى ذبح حلال وللا لأ..

ثانياً.. علشان منعرفش هى لحمة ايه بالظبط..

ثالثاً.. احنا منعرفش هى معموله ازاى وللا مفرومه ازاى..



فمن الأفضل نجهزها فى البيت..نختار لحمه صح..ونعملها بطريقه نضيفه وبشترى من محل لحوم موثوق منه..


انا عارفه ان انتوا عاوزين الطريقه وانا طولت عليكم..

اوك..



المقادير لخلطة البرجر..


1/2كيلو لحم مفروم ..

بصلة صغيرة مفرومه ناعم جدا و يفضل عصير البصل ..

ملح وفلفل للطعم..

بقسمات..

ملعقة صغيرة مستردة..

فلفل اخضر مهروس جيدا..

بهار لحم..


الطريقه..

نخلط جميع المقادير..جيداً وتشكل على هيئه دوائر..


ونتركها لمدة ساعة على الأقل في الثلاجة..

نسخن الشواية وندهن السلك بقليل من الزيت حتى لا يلتصق اللحم بالشواية..

نحضر الخبز و عليه الخس والبرجر والمخلل وشريحة جبن شيدر وشريحة بصل وشريحة طماطم والكاتشاب و يقدم..

ملحوظه مهمه..

سر أي طريقة عمل برجر هو وضعها في الثلاجة قليلا بالتتبيل وفرم البصل ناعم جدا حتى لا يتفتت اللحم و من الممكن عمل البرجر بكميات ووضعها في الفريزر إلى وقت استخدامها ..

وفى النهايه اتمنى تكون الوصفه اعجبت الجميع..




13 محتاجه أسمع رأيك..:

قلم رصاص يقول...

السلام عليكم ورحمة الله وبركاته

احجزززززززززز اول واجي اكل

لالالالالالالالا قصدي اعلق

هههههههههههههه

قلم رصاص يقول...

ايه بقى البورجر الفظيع ده

اهم حاجة في الموضوع اللحمة دي بتاعة ايه

انا شاكك في حضرتك ، انتي عندك كام خنزير عاوزه تزحلقيهم .. فملقتيش غير المدونين الغلابة اللي زينا تضحكي عليهم وتحطيهولهم في بورجر وغيره
هههههههههههههههههههههههههه

لالالا هذه الحيل لبنت حواء لن تنطلي على ابن آدم

نحن لن نركع ولن نسلم حتى يخرج اخر جندي امريكي من ارض العرب
هههههههههههههههههه

لابجد بقى حقيقي والله المدونة فكرتها متميزة جدا

الكلام ده بجد وبعيدا عن النفاق البلوجري وبعيدا عن المجاملات ، قولتيلي ليه ؟
هقول انا

عشان حضرتك حد متخصص في هذا الموضوع واكيد هتقوليلنا على حاجات انتي عارفاها كويس ومجرباها وخبرتك فيها احسن مننا بكتيييييير

فأنا باشجعك بجد على الاستمرار في هذه المدونة وان تقدمي لنا كل ماهو مفيد

بس طبعا ده كله كلام نظري على المدونة وانا الكلام ده ميخيلش علي ولا ينفعني
لأني مش فاضي انفذ الحاجات اللي حضرتك هتقولي لنا عليها في المطبخ لانها لاهي شغتلي ولا اعرفها

ثم انا اساسا وظيفتي اني اكل مش اطبخ
ههههههههههههههه

فحضرتك مطلوب منك ، كل طبق تتكلمي عنه هنا ، تلفي نسخه منه بالظبط في ورق سوليفان من بتاع المطاعم السوبر
وتحطيه في مكان متفق عليه وانا اروح اخده في معاد متفق عليه برضه

على غرار مسلسلات المخابرات زي رأفت الهجان والعميل 1001
ههههههههههههههههههههههه

استمري يافندم وان شاء الله النجاح حليفك

ودمتم في حفظ الله ورعايته

حياتى نغم يقول...

السلام عليكم / جزاكِ الله خيراً على ملاحظاتك ووصفتك حنجربها بإذن الله .
تحياتى .

لو عرفوه هيحبوه يقول...

السلام عليكم

جزاك الله خيرا اختى

نتمنى زيارتك لنا فى حمله لو عرفوه هيحبوه لنصره للتعريف بالنبى صلى الله عليه وسلم

رابطة هويتي اسلامية يقول...

السلام عليكم ورحمه الله وبركاته

وصفه رائعه جزاك الله خيرا

تدعوكى اسره رابطه هويتى اسلاميه لتشريفنا

hasona يقول...

السلام عليكم

حمد لله علي السلامة

فعلا الافضل الاعتماد علي البيت في تحضير كل/معظم المأكولات

نشكرك علي المقادير والطريقة

ونشكرك أكثر علي سر الصنعة

miada ref3at.. يقول...

قلم رصاص..
اهلا بيك فى مطبخى المتواضع..
اشكرك جداً لكاماتك انا عارفه ان انت بترفع من معنوياتى..
وحاضر ان شاء الله اى اكله هقدمها هخترع جهاز ينقل بالصوت والصوره والطعم هههههههههههههه..ويوصله للمنازل كمان لو حبيت..

اشكرك جدا لحسن المتابعه..

miada ref3at.. يقول...

حياتى نغم..

اشكرك جدا يا نغم لمتابعتك..
وان شاء الله لما جربيها مش هتندمى..

الف شكر..

miada ref3at.. يقول...

لو عرفوه هيحبوه..

رابطة هويتى اسلاميه..

اشكركم للزياره..
وجزاكم الله كل خير على الحمله الجميله دى بجد ربنا يوفقكم..
وان شاء الله ربنا يعطينى العمر واتابع باستمرار..

miada ref3at.. يقول...

HASONA..

اشكرك جدا للزياره واتمنى تكون الوصفه نالت الاعجاب..

وكل جديد ان شاء الله احاول انقله هنا..

FANTO يقول...

انا بصراحه مش ليا فى المطبخ بس نفسى الى ارتبط بيها تكون شطرة فى المطبخ

YaQeaN يقول...

همك على بطنك يا فانتو هههههههههه..
ان شاء الله اللى ترتبط بيها تكون شاطره فى كل حاجه..

نورتنى..

أم سيف الدين يقول...

جزاكم الله خيرا بس لي استفسار هو ينفع بدل البقسماط فول صويا مطحون وما قلتيش قد ايه البقسماط ولو صويا قد ايه بردو ؟